سياسه المواصلات 1

غريبه وسائل المواصلات دلوقتى لكل مواصله سياسه شكل

مثلا الاتوبيس "لازم تكون واد مدقدق ومفتح منعا للحوادث" اما المترو "لازم تعمل نفسك عندك كساح وشلل رباعى عشان تعرف تقعد او تتبع سياسه عبده العبيط وتزنق نفسك بين اتنين لحد ما واحد يقوم "اما التاكسى وهو من روائع المواصلات "حتى لو اتبعت سياسه الاخرس ده مش هايرحمك من محادثه السواق الرائع اللى فاهم كل حاجه واكتشف فجأه انه راهب الفكر توفيق الحكيم "

اما الطائرات " فمش عارفه لحد دلوقتى دى نمشى فيها تبع اى سياسه ....ليها سياسه عالميه ...مطار بقى "فاضل بقى كبيير الكل الميكروباص "لا تعليييييييييق"

تعالى بقى فى اول سياسه (الاتوبيس)"لازم تكون واد مدقدق ومفتح منعا للحوادث"

الواحد اول اما يركب الاتوبيس وكمان اتوبيس مكيف يعنى ابو 2 جنيه وساعات 2ونص يتوقع انه يلاقى معامله تانيه غير بتاعه ابو جنيه وبريزه "اللى بقى بجنيه وربع عشان البنزين "

تلاقى السواق مش طايقك ولو ليك باقى وواقف مستنيه يقولك ماتدخل تقعد هو انا يعنى هاكله عليييك ولا يعنى انت هاتختفى من الاتوبيس وتبدء قصيده ماتفهمش سببها....

تدخل ما تلاقيش مكان " اول القصيده" شويه والاتوبيس يبقى على اخره وتلاقى الناس واقفه عليييك "اومال لو كان بنص جنييه كنتوا عملتوا ايييه ....النجدددده" شويه ...ايه ريحه الدخان دى يا جماعه ..حد بيشرب سجاير هنا ...الله الله دى جايه من فتحه تكييف ...الاتوبييس بيولع يا اسطى ...بيولع ايه بس بطلوا المبالغه دى ...مش ناقص غير واحد يرش شويه ميه تقولوا بنغرق ...

ايه الرد الغريب ده...!

الدخان بيزيد وناس ابتدت تدووخ ...لا الموضوع بجد بقى ....على جنب يا اسطى

عللللللى جنننننب...

وينزل وهو عمال يشتم فى الناس والركاب ...قال ايه بيموتوا طيب وفيها ايه ...ما يستحملوا ما انا سايق طول النهار ....ومايمنعش برده من كام نظره شذرا لكل واحد..

اتوبيس تاااانى ...

(يارب الاقى مكان بقى ...ولو ليا باقى هاسيبه ...صدقه برده ...)

الحمد لله لقيت مكان ..هاقعد يا سلاااااام ...

ايه اللى بيلعب ده ..هى شنطتى بتتحرك لوحدها ...راكبها جوووست ولا ايييه...

تبص تلاقى اللى جنبك ايده فى شنطتك ....خير حضرتك انت فاكرها ساندويتش هتاخد حته ...والغريب انه يبصلك ازاى قفشته بيسرقك ..انت اتجننت ...

على جننب يا اسطى فيييه حرااامى ...

حرااامى ايه يا انسه ..ده انا كنت بعدلهالك ...

لا فيك الخير والله ...بتراعى مشاعر الناس ...حونين....

استنى يظهر سوبر مان يجيبلى حقى ......لا حياه لمن تنادى

قومت بكرامتى قعدت فى مكان تانى ولكن هيهااااات

فجأه هزه عنيييفه فى الاتوبيس "برئ يا بيييه ...برئ"

ايه ده ..ده مش غزو ...

ده بكل بساطه عربيه ملاكى دخلت فى الاتوبيس " اللى يعيش ياما يشوووف "

نص العربيه جوا الاتوبيس ..."ماتقولش ايه ادتنا مصر ...قول احنا ادينا ايه لمصر ....نص عربيه ملاكى ...!"

ويا ترى ليييه ...عشان السواق كان مزاجه ينزل يجيب شاى ...

ويتبع هنا السواق سياسه خدوهم بالصوت لا يغلبوكوا....

الاتوبيس السحرى!!!...

قالولى لما تحبى توقفى اتوبيس شاوري للسواق ....ده كان زماااااااان...

دلوقتى عشان تحب توقف اتوبيس لازم تكون رياضى كده ....وتعتبر نفسك فى مسابقه جرى ...تشاور يقولك حصلنى ...واطلع اجرى بقى يا معلم ....

طيب لو مش شاب رياضى ومش هاتلحقه ....انا لسه مالقتهاش حل ......بس انصحك احفظلك كام تعويذه كده ....للانتقام برده ...يعنى ما وقفش ..فيه عجل يتفرقع ...ازاز يطق ....

ده كان ابو 2 ونص ...اللى يمكن يبقى ب 3 عشان البنزين ...

او عشان السواق منزنوق فى كوبايه شاى برده ...

من الاخر لو انت شاب مدقدق ورياضى ومايمنعش تتعلم حبه رياضه ..الله اعلم برده ..

ماشى بمبدأ "الرجوله هز اكتاف مش ادب "

يبقى توكل على الله وقول التعويذه ....!