نيجى دلوقتى للسياسه العالميه ...السياسيه اللى عدت البحار والجبال ...الطيراااان
ممكن كتير ما ركبوش طيارات قبل كده "احسن والله" ...بس عايزاكوا تعيشوا معايا اللحظه ......
الناس بتعتبر ان بمجرد الدخول للمطار هما كده فى عالم تانى ...مافيهوش اى حواجز وان الناس كلها اصحاب وعارفه بعض
عادى يعني....
ويا سلام بقى جوا الطياره ....ممكن حد يحكيلك قصه حياته كلها بمجرد ان انت ابتسمت فى وشه .....فكرت ساعتها فى خدعتين ...اول واحده وانا فى المطار
انى احط السماعات فى ودانى واشغل اي حاجه .....عشان ماحدش ييجي يكلمنى ...ولكن هيهاااااات.....
تانى خدعه انى اجيب قصه معايا اقرا فيها ...عشان برده ماحدش ييجي يكلمنى
ولكن برده هيهياااااات...وياريت بتيجى على كده وبس....
الرحله الاولى ....
من المعروف بتاخد تذكرتك تروح تقعد فى مكانك وتستنى الطياره انها تطير ....فجأه واحده جايه بعيل صغير ....رمت العيل على حجرى ....ثانيه واحده بس اطلع الشنطه ....وقعدت وارتاحت وتقريبا كانت هتنام والولد على رجلى ...قولت طفل صغير العب معاه عادى يعنى "نيتى بريئه والله " ....لقيته مسك النضاره رماها فى الارض ....ليه كده يا حبيبى بس .....مسك الكتاب اللى فى ايدى رماه على الارض برده ....
والدته قررت تتدخل ....ليه تعمل فى خالتو كده بس ......خالتو!!!!!!!!!!!!!!!!
ده انتى فى سن والدتى ......عديتها وسكت عاااادى ....
حبه كمان والولد عيط ...جعان الله .....
فجأه لقيت الولد على حجرى والببرونه فى ايدى وبتقولى أكليه ....تقريبا بتتبع مبدأ " ارمى ابنك على اللى جنبك " ......
الرحله التانيه ....
نفس التذكره وتروح تقعد فى نفس المكان وتستنى الطياره تطير وييجى الناس جنبك ....
اول ما الطياره بتطير ...ألمضيفه بتقول ارشادات فى حال لو حصلت حاجه خطر...واحده جانبى بقى "غير بتاعه الرحله الاولى" ...يعنى احنا لو حصلت حاجه هانقعد نفكر نربط ايه ونفك ايه احنا هانطلع نجرى على طول ..لسه ماخلصتش كلامها وفجأه .....أيها الساده الركاب نأسف لوجود عطل بالطائره وهانضطر نرجع للمطار....ماقدرتش اعمل حاجه غير انى ابصلها شذرا ..."نشنت يا فاااااااالح".....بعد ما رجعنا ...فجأه ....انا بتخنق مش قادره ...مش عارفه اخد نفسى ...حد يلحقنى ....وهي قايمه ..مالت عليا فى ودنى ..خلى بالك من الشنطه عشان فيها فلوس !!!!!!!!!
الرحله التالته.....
وصلت للكرسى ....وهنا تبدء المأساه ....قاعده فى النص ....ست كبيره هاتقعد جنبى ...وراجل كبير من الناحيه التانيه ....
الراجل بيكلم الست ....الا قوليلى يا حاجه ...عملتى عمره ...اه يا بنى ...حجيتى ....اه ...يبقى ما فضلش غير الجواز ....وهاهاهاهاهاها ....
لقيته هايلفلى انا ....قالى وانتى يا بنتى ...عملتى عمره ....حجيتى ....يبقى ما فضلش غير ايه ؟؟؟ ....مافضلش غير الجواااز .....ونفس ال هاهااهاهاهاها
وفجأه قعد يحكيلى انه هايروح للحاجه فى مصر القديمه ...بس هاتكون نايمه ...يالا هي ونصيبها بقى ....وبعدين هاعدى على عيالى واروح اسكندريه ..اللى عايز ييجى ييجى ...واللى مش عايز براحته .....
عارفه يا بنتى الحته اللى انا فيها قعدت يومين تمطر تراب ....انتى مش مصدقانى ...طيب والله كانت بتمطر تراب ....انا برده كل ما اقول لحد يستغرب مش عارف ليه!!!! ....
وبعد ما فقد منى الامل وانا حطيت وشى جوا الكتاب اللى فى ايدى ....
لقيت الحاجه مسكتنى ....عندها 72 سنه .....وللاسف كانت بتحكيلى ال 72 سنه يوم يوم من حياتها ....وحداكى ولدى الباشمهندس عادل باشمهندس زراعى ...والولاد عندى شبه ابوهم انما البنات شبهى انا ....والحاج قالى لو مانزلتيش هازعل منك ..و...و...و.....
قبل ما تركب اي طياره ...لو شكلك مايجبش اجنبى وتعمل نفسك مش فاهم ...اعمل نفسك اطرش ....او ممكن ......ولا اقولك انا جربت كل حاجه ...مش هاينفع ...امرك لله
بس ابقى خد قرصين بروفين قبل ما تقعد على الكرسى .....
0 التعليقات:
إرسال تعليق